Påske er for mange synonymt med hyttetur, sjokolade og påskeskirenn. Som forskar på slektskap og familierelasjonar i det norske hytteliv, er påskeferien ei viktig tid for undersøkingar.
Så sjølv om ikkje feltarbeidet mitt byrjar for fullt før til sumaren, var det viktig å gjere eit førebuande feltarbeid allereie denne påska. Feltarbeidet omhandlar datainnsamling; deltakande observasjon og intervju på norske hytter, hytteeigarar og – brukarar.
Folk har vist stor interesse for prosjektet og har teke godt imot meg både på intervju heime og på visitt på hyttene deira. No er eg tilbake etter å ha vore på ein liten felttur blant hyttefolk i Austlandsområde. I fjellet fann eg påskepynta hytter og fjellkledde folk, klare til å nyte høgtida og fridagane på hyttene sine- som dei hadde gjort kvar påske heile livet. Påskesola har no gått over til vårsol. No blir det meir lesing før feltarbeidet kjem i gong att til sumaren.
