Føreord
Denne rapporten byggjer på analysar av data frå Makt- og demokratiutgreiinga si Leiarskapsundersøking 2000. Då vi gjer utstrakt bruk av fargar i grafane som følgjer, tilrår vi at rapporten vert skriven ut på fargeskrivar. For spørjeskjema og detaljerte opplysningar vedrørande planlegginga og gjennomføringa av spørjeundersøkinga, viser vi til Holt og Prangerød (2001) sin dokumentasjonsrapport og til drøftingane i Gulbrandsen (red) 2002.
Delar av tidlegare analysar har vore presenterte på ”Colloque franco-norvégien autour de l’oevre de Pierre Bourdieu”, EHESS, Paris, 4.juni 2002, på Stalheim-seminaret ”Pierre Bourdieu og norske maktfelt”, Stalheim Hotell, 27.-29. september 2002, og på British Sociological Association sin workshop ”Social Capital and Social Networks”, Manchester University, 29. november 2002.
Forfattarane vil særleg takke Frédéric Lebaron, Brigitte Le Roux, Lennart Rosenlund og Henry Rouanet for avgjerande støtte, gode råd og kritiske innspel undervegs i arbeidet. Likeeins har Trygve Gulbrandsen og Trond Beldo Klausen vist stor velvilje og ytt framifrå service med omsyn til å få tilgang til datamaterialet. Endeleg vil vi rette ei takk til Øyvind Østerud, som i etterkant av Stalheimseminaret 2002 gav oss i oppdrag å utforme denne rapporten til Makt- og demokratiutgreiinga. Hovudforfattar er Johs. Hjellbrekke. Han har lagt data til rette for å ta i bruk dei særskilte analyseverktya, og utført dei omfattande analysane som rapporten byggjer på. Forfattarane har i fellesskap utvikla idéane bak opplegget av dataanalysane, tolka resultata av dataanalysane og skrive ut den endelege rapporten.
Ein del av dei data som er nytta i denne publikasjonen er henta frå International Social Survey Program (ISSP) si undersøking ”Work Orientations II 1997”, formidla av Norsk samfunnsvitskapleg datateneste (NSD). ISSP og NSD er ikkje ansvarleg for analysen av data eller dei tolkinga som er gjorde her.
Ansvaret for feil og manglar fell på forfattarane aleine.
New York/Bergen, 2003
Johs. Hjellbrekke og Olav Korsnes